URGANCH DAVLAT PEDAGOGIKA INSTITUTI REKTORINING XALQARO XOTIN-QIZLAR KUNI MUNOSABATI BILAN BAYRAM TABRIGI

URGANCH DAVLAT PEDAGOGIKA INSTITUTI REKTORINING XALQARO XOTIN-QIZLAR KUNI MUNOSABATI  BILAN BAYRAM TABRIGI

Hurmatli professor-o‘qituvchilar! 
Aziz talaba-qizlar!

Avvalo, sizlarni 8-mart – Xalqaro xotin-qizlar kuni munosabati bilan samimiy muborakbod etaman.

Ushbu qutlug‘ sana jamiyatimiz hayotida muhim o‘rin tutayotgan, ilm-ma’rifat va tarbiya yo‘lida fidokorona mehnat qilayotgan ayollarga bo‘lgan hurmat va ehtiromning yana bir yorqin ifodasidir. Ayol – nafaqat oila tayanchi, balki jamiyat taraqqiyoti, ma’naviy muhit va kelajak avlod kamolotining muhim omilidir.

Bugungi kunda yurtimizda xotin-qizlarning huquq va manfaatlarini ta’minlash, ularning ta’lim olishi, kasbiy salohiyatini ro‘yobga chiqarishi, ilm-fan hamda jamiyat hayotining turli sohalarida faol ishtirok etishi uchun keng imkoniyatlar yaratilmoqda. Bu esa ayollarning jamiyatdagi o‘rni va nufuzini yanada mustahkamlashga xizmat qilmoqda.

Urganch davlat pedagogika institutida ham xotin-qizlarning ilmiy, pedagogik va tashkiliy faoliyatdagi ishtiroki alohida e’tiborga loyiqdir. Institutimizda samarali faoliyat yuritayotgan olima va pedagog ayollar, fidoyi xodimalar hamda bilim olishga intilayotgan talaba-qizlarimiz ta’lim muassasamizning intellektual salohiyati va ma’naviy muhitini boyitishda muhim o‘rin tutmoqda.

Ayniqsa, yosh avlodni tarbiyalash, ularga chuqur bilim va yuksak ma’naviyatni singdirishdek sharafli vazifani sidqidildan ado etayotgan ustoz ayollarimizning mehnati tahsinga sazovordir. Sizlarning bilim, matonat va mehr-muhabbatga yo‘g‘rilgan faoliyatingiz institutimiz taraqqiyotida muhim ahamiyat kasb etmoqda.

Aziz talaba-qizlar! Sizlar kelajakda jamiyatimiz taraqqiyotiga munosib hissa qo‘shadigan yetuk mutaxassislar bo‘lib yetishasiz. Bugun yaratilayotgan imkoniyatlardan unumli foydalanib, chuqur bilim olish, ilmiy izlanishlar olib borish va yurtimiz ravnaqi uchun munosib kadrlar bo‘lib kamol topishingizga ishonaman.

Ushbu qutlug‘ bayram munosabati bilan barchangizga mustahkam sog‘liq, oilaviy baxt-saodat, tinchlik-xotirjamlik hamda ilmiy va kasbiy faoliyatingizda yangi yutuqlar tilayman.

Bayramingiz muborak bo‘lsin!

Feruza Madraximova
Urganch davlat pedagogika instituti rektori, professor